Rannsóknarnefndir Alþingis - Fréttasarpur

Skýrsla rannsóknarnefndar Alþingis vegna snjóflóðs í Súðavík 16. janúar 1995

Mon, 15 Dec 2025 15:02:00 +0000

Rannsóknarnefnd Alþingis vegna snjóflóðs í Súðavík 16. janúar 1995, sem starfaði á grundvelli ályktunar Alþingis 30. apríl 2024, afhenti forseta Alþingis skýrslu um rannsóknina kl. 13.00 í dag, mánudaginn 15. desember 2025.

Sama dag kl. 15.00 var á heimasíðu nefndarinnar opnað fyrir aðgang að skýrslunni og gögnum sem fylgja henni í viðaukum. Vefútgáfa skýrslunnar er aðalútgáfa hennar og eru viðaukar með henni einungis birtir á heimasíðu nefndarinnar. Einnig er vísað til þeirra með tenglum þar sem við á umfjöllun í skýrslunni.

Lok rannsóknar og birting skýrslu rannsóknarnefndar

Thu, 11 Dec 2025 13:59:00 +0000

Rannsóknarnefnd Alþingis vegna snjóflóðsins í Súðavík 16. janúar 1995 sem skipuð var á grundvelli ályktunar Alþingis 30. apríl 2024 um slíka rannsókn hefur lokið rannsókn sinni.

Rannsóknarnefndin afhendir forseta Alþingis skýrslu um rannsóknina mánudaginn 15. desember nk. kl. 13.00. Eftir það er fulltrúum fjölmiðla boðið til kynningar rannsóknarnefndar á rannsókninni og helstu atriðum í skýrslunni kl. 15.00 sama dag. Kynningin fer fram í húsnæði Alþingis, nánar tiltekið ráðstefnusalnum Kvos á 1. hæð Smiðju, Tjarnargötu 9.

Samhliða kynningu á skýrslunni fyrir fulltrúum fjölmiðla þennan dag verður skýrslan birt með gögnum sem fylgja henni. Opnað verður fyrir aðgang að skýrslunni og fylgigögnum hennar á vef rannsóknarnefnda Alþingis, þ.e. á heimasíðu rannsóknarnefndarinnar . Vefútgáfa skýrslunnar er aðalútgáfa hennar.

Þátttaka rannsóknarnefndar vegna snjóflóðs í Súðavík 16. janúar 1995 í málþinginu Ofanflóð 2025 5.-6. maí nk. og viðvera á Ísafirði og í Súðavík dagana á eftir

Mon, 14 Apr 2025 15:00:00 +0000

Meðlimir rannsóknarnefndar Alþingis vegna snjóflóðsins í Súðavík 16. janúar 1995 verða meðal þátttakenda á málþinginu Ofanflóð 2025 um snjóflóð og samfélög sem fram fer á Ísafirði 5. og 6. maí nk. Nefndin verður svo áfram á Ísafirði og í Súðavík dagana á eftir, 7. og 8. maí, vegna starfa sinna.

Af þessu tilefni vill nefndin láta vita að þau sem kynnu að vilja hitta og ræða við nefndina eða koma upplýsingum á framfæri við hana meðan á dvöl hennar á svæðinu stendur er vitaskuld velkomið að hafa samband í því skyni.

Upplýsingar um netfang og símanúmer nefndarinnar, ásamt frekari upplýsingum um skipan hennar og verkefni, er að finna hér á heimasíðu nefndarinnar.

Rannsókn vegna snjóflóðsins í Súðavík 16. janúar 1995

Fri, 22 Nov 2024 14:51:00 +0000

Með ályktun Alþingis nr. 12/154 í samræmi við lög um rannsóknarnefndir, nr. 68/2011, var ákveðið að skipa nefnd þriggja einstaklinga til að rannsaka málsatvik í tengslum við snjóflóð sem féll í Súðavík 16. janúar 1995.

Í nefndina hafa verið skipuð Finnur Þór Vilhjálmsson héraðsdómari, sem er jafnframt formaður nefndarinnar, Dóra Hjálmarsdóttir rafmagnsverkfræðingur, og Þorsteinn Sæmundsson jarðfræðingur.

Fréttatilkynning frá rannsóknarnefnd Alþingis

Wed, 29 Mar 2017 10:13:00 +0000

Rannsóknarnefnd Alþingis hefur sannreynt að þýski bankinn Hauck & Aufhäuser var aldrei í reynd fjárfestir í Búnaðarbankanum þegar 45,8% hlutur ríkisins í honum var seldur í janúar 2003, ólíkt því sem haldið var fram allt frá upphafi. Það er afdráttarlaus niðurstaða rannsóknarnefndar Alþingis að stjórnvöld hafi skipulega verið blekkt í aðdraganda og kjölfar sölunnar.

Skýrsla rannsóknarnefndar Alþingis um þátttöku Hauck & Aufhäuser Privatbankiers KGaA í einkavæðingu Búnaðarbanka Íslands hf. árið 2003.

Fréttatilkynning

Mon, 27 Mar 2017 10:30:00 +0000

Rannsóknarnefnd Alþingis um þátttöku þýska bankans Hauck & Aufhäuser Privatbankiers KGaA í kaupum á 45,8% eignarhlut ríkisins í Búnaðarbanka Íslands hf. sem skipuð var á grundvelli þingsályktunar frá 2. júní 2016, afhendir forseta Alþingis skýrslu sína miðvikudaginn 29. mars kl. 10:00. Í framhaldinu efnir nefndin til fréttamannafundar kl. 10:30 í Iðnó.

Opnað verður fyrir aðgang að skýrslunni samhliða á vef rannsóknarnefnda Alþingis. Vefútgáfa skýrslunnar er aðalútgáfa hennar.

Rannsókn á kaupum í Búnaðarbanka

Thu, 7 Jul 2016 10:20:00 +0000

Forseti Alþingis, Einar K. Guðfinnsson, hefur að höfðu samráði við forsætisnefnd og stjórnskipunar- og eftirlitsnefnd þingsins, sbr. 2. gr. laga nr. 68 2011, um rannsóknarnefndir, skipað Kjartan Bjarna Björgvinsson héraðsdómara til að stýra rannsókn á þátttöku þýska bankans Hauck & Aufhäuser Privatbankiers KGaA í kaupum á 45,8% eignarhlut ríkisins í Búnaðarbanka Íslands hf. o.fl. árið 2003, sbr. ályktun Alþingis frá 2. júní 2016. Rannsókninni er ætlað að ljúka eigi síðar en 31. des. 2016.

Skýrsla rannsóknarnefndar Alþingis um rannsókn á aðdraganda og orsökum erfiðleika og falls sparisjóðanna

Sat, 12 Apr 2014 17:35:00 +0000

Rannsóknarnefnd Alþingis um rannsókn á aðdraganda og orsökum erfiðleika og falls sparisjóðanna, sem var skipuð í ágúst 2011 á grundvelli þingsályktunar frá 10. júní 2011, afhenti forseta Alþingis skýrslu sína 10. apríl 2014.

Rannsóknarnefnd Alþingis um Íbúðalánasjóð

Tue, 2 Jul 2013 14:03:00 +0000

Rannsóknarnefnd Alþingis um Íbúðalánasjóð, sem var skipuð í september 2011 á grundvelli þingsályktunar frá 17. desember 2010, skilaði skýrslu sinni þriðjudaginn 2. Júlí 2013. Formaður nefndinnar var Sigurður Hallur Stefánsson, fyrrverandi héraðsdómari. Með honum í nefndinni voru Kirstín Flygenring hagfræðingur og Jón Þorvaldur Heiðarsson, lektor við viðskiptafræðideild Háskólans á Akureyri.

Skipun rannsóknarnefndar Alþingis sem rannsaka á Íbúðalánasjóð

Tue, 25 Oct 2011 14:21:00 +0000

Gengið hefur verið frá frá skipun rannsóknarnefndar Alþingis sem rannsaka á Íbúðalánasjóð. Í henni eiga sæti Sigurður Hallur Stefánsson, fv. héraðsdómari, formaður nefndarinnar, Kirstín Flygenring hagfræðingur og Jón Þorvaldur Heiðarsson, lektor við viðskiptafræðideild Háskólans á Akureyri.

Skipun rannsóknarnefndar Alþingis sem rannsaka á aðdraganda og orsakir erfiðleika og falls sparisjóðanna

Tue, 25 Oct 2011 13:35:00 +0000

Gengið hefur verið frá skipun rannsóknarnefndar Alþingis sem rannsaka á aðdraganda og orsakir erfiðleika og falls sparisjóðanna. Í henni eiga sæti Sigríður Ingvarsdóttir héraðsdómari, formaður nefndarinnar, Tinna Finnbogadóttir hagfræðingur og Bjarni Frímann Karlsson, lektor við viðskiptafræðideild Háskóla Íslands.

Rannsóknarnefndir Alþingis taka til starfa

Mon, 17 Oct 2011 14:23:00 +0000

Á nýafstöðnu þingi samþykkti Alþingi tvær þingsályktanir, annars vegar um rannsókn á Íbúðalánasjóði og hins vegar um rannsókn á aðdraganda og orsökum erfiðleika og falls sparisjóðanna. Jafnframt voru á þinginu samþykkt almenn lög um rannsóknarnefndir en með þeim er Alþingi fengið þýðingarmikið úrræði til þess að sinna eftirlitshlutverki sínu með framkvæmdarvaldinu. Á grundvelli þeirra hefur forseti Alþingis, að undangengnu samráði innan Alþingis, skipað tvær rannsóknarnefndir til þess að sinna þeim rannsóknum sem þingið hefur samþykkt að hefja.