Rannsóknarnefndir Alþingis - Fréttir og tilkynningar

Skýrsla rannsóknarnefndar um rannsókn á aðdraganda og orsökum erfiðleika og falls sparisjóðanna

Sat, 12 Apr 2014 17:34:00 +0000

Rannsóknarnefnd Alþingis um rannsókn á aðdraganda og orsökum erfiðleika og falls sparisjóðanna, sem var skipuð í ágúst 2011 á grundvelli þingsályktunar frá 10. júní 2011, afhenti forseta Alþingis skýrslu sína 10. apríl 2014.

Hér má nálgast vefútgáfu skýrslunnar. Vefútgáfan er aðalútgáfa skýrslunnar.

Breyting á skipan rannsóknarnefndar um sparisjóðina

Thu, 11 Oct 2012 10:41:00 +0000

Forseti Alþingis féllst hinn 20. september sl. á ósk Sigríðar Ingvarsdóttur héraðsdómara frá 5. september sl. um lausn frá starfi formanns rannsóknarnefndar um sparisjóðina. Sigríður hefur snúið til fyrri starfa sem héraðsdómari við Héraðsdóm Reykjavíkur.
Á fundi forsætisnefndar Alþingis í dag greindi forseti Alþingis jafnframt frá því að hann hefði skipað Hrannar Má S. Hafberg, lögfræðing, formann nefndarinnar.

Skipun rannsóknarnefndar Alþingis sem rannsaka á aðdraganda og orsakir erfiðleika og falls sparisjóðanna

Tue, 25 Oct 2011 13:35:00 +0000

Gengið hefur verið frá skipun rannsóknarnefndar Alþingis sem rannsaka á aðdraganda og orsakir erfiðleika og falls sparisjóðanna. Í henni eiga sæti Sigríður Ingvarsdóttir héraðsdómari, formaður nefndarinnar, Tinna Finnbogadóttir hagfræðingur og Bjarni Frímann Karlsson, lektor við viðskiptafræðideild Háskóla Íslands.

Rannsóknarnefndir Alþingis taka til starfa

Mon, 17 Oct 2011 14:23:00 +0000

Á nýafstöðnu þingi samþykkti Alþingi tvær þingsályktanir, annars vegar um rannsókn á Íbúðalánasjóði og hins vegar um rannsókn á aðdraganda og orsökum erfiðleika og falls sparisjóðanna. Jafnframt voru á þinginu samþykkt almenn lög um rannsóknarnefndir en með þeim er Alþingi fengið þýðingarmikið úrræði til þess að sinna eftirlitshlutverki sínu með framkvæmdarvaldinu. Á grundvelli þeirra hefur forseti Alþingis, að undangengnu samráði innan Alþingis, skipað tvær rannsóknarnefndir til þess að sinna þeim rannsóknum sem þingið hefur samþykkt að hefja.